Россиядә һәр дүртенче кеше акчасын конвертта саклый

Ә һәр бишенчесе диярлек банк хисабы яки кертем куллана. Бу хакта 2 мең кеше арасында үткәрелгән сораштыруда әйтелә, дип хәбәр итә РИА Новости.

Сораштыру нәтиҗәләреннән күренгәнчә, россиялеләрнең 23 проценты эре сатып алуларга алдан әзерләнми һәм кирәкле сумманы хезмәт хакыннан түли. Респондентларның 14 проценты кредит яки бүлеп түләүне сайлый, ә 8 проценты финанс резервын куллана. Тагын 7 проценты зур сатып алулар өчен якыннарыннан акча алып тора.

Респондентларның 38 проценты өчен зур сатып алу 10 мең сумнан башлана. 31 проценты 30 мең сумнан артык чыгымнарны эре дип саный. Респондентларның 17 проценты өчен бу чик 70 мең сумнан, ә 14 проценты өчен 150 мең сумнан башлана.

Түләү ысуллары арасында банк карталары беренче урында тора, аларны сораштырылучыларның 36 проценты куллана. Тиз түләүләр системасын һәм электрон янчыкларны респондентларның 22шәр проценты сайлый. Акчалата түләүчеләр 17 процент тәшкил итә.

Шулай ук сатып алучылар өчен кешбэк һәм бонуслар да мөһим булуы ачыкланган. Сораштыруда катнашучыларның 43 проценты түләү ысулын сайлаганда өстәмә бүләкләрне һәм акчаның бер өлешен кире кайтару мөмкинлеге булганын сайлавын белдергән.

БЕЗНЕҢ МАКС КАНАЛЫНА ЯЗЫЛЫГЫЗ!