Рөстәм Миңнеханов ТР Хөкүмәте Йортында узган киңәшмәдә берничә йөкләмә бирде

«Иминлекне тәэмин итү өстенлекле бурыч булып тора. Күп районнар бәйрәмне үткәрүне тәэмин итә. Бәйрәм чаралары барышында күңелсезлекләр булдырмау буенча чаралар күрергә һәм тулаем алганда югары дәрәҗәдәге хокук тәртибен тәэмин итәргә кирәк», – дип ассызыклады ТР Рәисе.

Гадәттәгечә июньнең өченче якшәмбесендә илдә Медицина хезмәткәре көне билгеләп үтелә. Республиканың сәламәтлек саклау тармагында 74 меңгә якын кеше эшли. «Без табибларыбызга, урта һәм кече медицина персоналына, тармакның барлык хезмәткәрләренә кешелеклелекләре, ныклыклары һәм ярдәмчеллекләре өчен чиксез рәхмәтле. Киләсе атнада, 24 июньдә, без "Ел табибы - Ак чәчәкләр" конкурсы кысаларында республика дәрәҗәсендәге һөнәр ияләрен котлаячакбыз», – диде Рөстәм Миңнеханов.

Ул Сәламәтлек саклау министрлыгына һәм муниципаль берәмлекләр башлыкларына һәр шәһәрдә һәм районда медицина хезмәткәрләрен хөрмәтләүне оештырырга, сәламәтлек саклау ветераннарына аерым игътибар бирергә кушты.

Киләсе дүшәмбедә, 22 июньдә, бөтен ил буйлап Хәтер һәм кайгы көненә багышланган чаралар узачак. «Бөек Ватан сугышы башлануга 85 ел узды. Бу фаҗигале датада без миллионлаган һәлак булганнар истәлеге алдында баш иябез. Ватанны саклауга Советлар Союзының барлык халыклары басты, сугыш һәр гаиләгә диярлек кагылды. Татарстаннан фронтка 700 мең кеше киткән, аларның яртысыннан артыгы өйләренә әйләнеп кайтмаган. Без илебезне саклап калган һәм киләчәк буыннарга тынычлык бүләк иткән Ватанны саклаучыларның, шулай ук тылда Җиңүне якынайткан хезмәтчәннәрнең батырлыгын һәрвакыт истә тотарга һәм хөрмәт итәргә тиеш. Искә алу чаралар бөтен республика буенча узачак. Шәһәр һәм район башлыкларына, республика органнары җитәкчеләренә аларны югары дәрәҗәдә оештырырга, шәхсән катнашырга, куркынычсызлык чараларын тәэмин итәргә кушам», – диде Татарстан Рәисе.

Киләсе атнада, 25 июньдә, Татарстан АССР төзелүгә 106 ел тулу көне билгеләп үтелә. «Бу мөһим вакыйга яңа тарихи шартларда республика дәүләтчелегенең формалашуын билгеләде һәм безнең алга баруыбызның этәргеч ноктасы булды. Бүген безнең республика – Россиянең терәк төбәге, социаль-икътисадый күрсәткечләр һәм тормыш сыйфаты буенча лидерларның берсе. Без республиканың чәчәк атуына өлеш керткән барлык буын татарстанлыларга рәхмәтле», – диде Рөстәм Миңнеханов.

БЕЗНЕҢ МАКС КАНАЛЫНА ЯЗЫЛЫГЫЗ!