22 октябрь 2026 Яңалыклар

Татарстан пешекчеләре Индонезия һәм Тунистан җиңүләр белән кайтты

Татарстанның шеф-пешекчеләр җыелма командасы Индонезия һәм Тунистагы халыкара чемпионатлардан ике алтын медаль белән кайтты. Бүген «Татар-информ»да узган матбугат конференциясендә Рестораторлар һәм отельерлар ассоциациясе вәкилләре, шеф-пешекчеләр үзләре сәфәрләрнең нәтиҗәләре һәм ярышларның үзенчәлекләре турында фикер алышты.

«Казан – Россия Федерациясенең гастрономия башкаласы, һәм без барлык чараларны бу исемне расларлык итеп үткәрергә тырышабыз – бу бик җитди һәм бик җаваплы исем», - дип ассызыклады Рестораторлар һәм отельерлар ассоциациясе президенты Зөфәр Гаязов.

Җиңүләр тарихы 2023 елда ук «Россия – Ислам дөньясы» форумында башланды. Ул вакытта, Рестораторлар һәм отельерлар ассоциациясе президенты Зөфәр Гаязов сүзләренчә, Татарстан командасы Төркия хезмәттәшләрендә кызыксыну уяткан.

«Алар: «Истанбулга килегез, анда ничек чыгыш ясавыгызны карарбыз», – диделәр. Чакыруны кабул иттек һәм җиңдек. Шуннан бирле Татарстан пешекчеләре халыкара турнирларда үз дәрәҗәсен даими раслый», - дип билгеләп үтте Гаязов.

БЕЗНЕҢ МАКС КАНАЛЫНА ЯЗЫЛЫГЫЗ!