15 июнь 2026 Яңалыклар

Татарстанда 19 яшьлек слесарь машинаны буяган да урлаган

Чаллыда 19 яшьлек егеткә автомобиль урлау буенча җинаять эше кузгатканнар. Бу хакта «Татар-информ» Эчке эшләр министрлыгы хәбәренә таянып яза. Хокук саклау органнары мәгълүматларына караганда, слесарь егет шул ук предприятиедә эшләүче 38 яшьлек ир-атның автомобиленә кул сузган.

Хуҗасы машинасын бер ай чамасы вакытка парковкага калдырган булган. 19 яшьлек егет шуннан файдаланган. Угры, чит мөлкәткә кул сузганчы, иң элек машинаны буяган, аккумулятор куйган, көпчәкләрен тутырган да, ачкычын табып, руленә утырып киткән. Моннан тыш, хокук саклау органнары хезмәткәрләренең туктату ихтималын күздә тотып, машинаны сатып алу турында ялган килешү ясаган.

Автомобильне шул тирәдәге башка парковкада табып, хуҗасына кире кайтарганнар. Ир-ат китерелгән зыянны 100 мең сум белән бәяләгән. Шикләнелүче шәһәрдән чыгып китмәү шарты белән әлегә өендә утыра.

БЕЗНЕҢ МАКС КАНАЛЫНА ЯЗЫЛЫГЫЗ!